الرياح (باللغة الأردية)

ہوائیں

ترجمه

سيف الرحمن التيمي

پہلا خطبہ

حمد وثنا کے بعد!

اللہ تعالی کی مخلوق میں اس کی بہت سی خیرہ چشم نشانیاں مضمر ہیں، کچھ مخلوقات کو اللہ خیر وبھلائی اور رحمت کے ساتھ بھیجتا ہے تو کچھ مخلوق کو عذاب اور سزا کے ساتھ بھیجتا ہے، جس کے ذریعہ کچھ لوگوں کی آزمائش ہوتی ہے تو کچھ لوگوں کے لیے وہ باعث نفع ہوتی ہے ۔

 

میرے ایمانی بھائیو! ماضی قریب میں ہمارے ملک کے کچھ علاقوں میں تیز وتند آندھی اٹھی ، آسمان کا رنگ سرخ ہوگیا اور فضا غبار آلود ہوگئی اور جو لوگ سانس کی بیماری یا دمہ کے عارضے سے دوچار ہیں، ان کے لیے بڑی مصیبت کھڑی ہوگئی۔

 

معزز نمازیو!

 

آندھی طوفان کے تعلق سے سیرت نبوی میں ہمارے لیے تین قابل غور پہلو ہیں:

پہلا نکتہ: آندھی اور بادل کے دنوں میں   نبی صلی اللہ علیہ وسلم کی حالت وکیفیت:

امام مسلم نے اپنی صحیح میں عائشہ رضی اللہ عنہا سے روایت کیا ہے، وہ فرماتی ہیں: رسول اللہ ﷺ کی عادت مبارکہ تھی کہ جب آندھی یا بادل کا دن ہوتا تو آپﷺ کے چہرہ مبارک پر اس کا اثر پہچانا جا سکتا تھا، آپ ﷺ (اضطراب کے عالم میں) کبھی آگے جاتے اور کبھی پیچھے ہٹتے، پھر جب بارش برسنا شروع ہو جاتی تو آپ اس سے خوش ہو جاتے اور وہ (پہلی کیفیت) آپﷺ سے دور ہو جاتی، حضرت عائشہ رضی اللہ تعالیٰ عنہا نے کہا: میں نے (ایک بار) آپﷺ سے (اس کا سبب) پوچھا تو آپﷺ نے فرمایا: "میں ڈر گیا کہ یہ عذاب نہ ہو جو میری امت پر مسلط کردیا گیا ہو" اور بارش کو دیکھ لیتے تو فرماتے "رحمت ہے"۔

 

صحیح بخاری کی ایک روایت میں ہے : "عائشہ! مجھے اس بات سے کیا چیز امن دلا سکتی ہے کہ کہیں ان میں عذاب (نہ) ہو، ایک قوم آندھی کے عذاب کا شکار ہوئی تھی اور ایک قوم نے عذاب کو (دور) سے دیکھا تو کہا: "یہ بادل ہے جو ہم پر بارش برسائے گا"۔

 

سب سے افضل انسان کی یہ حالت وکیفیت ہے، تو ہماری کیفیت کیسی ہونی چاہئے، مسلمان کے لیے مشروع ہے کہ ایسے عالم میں اس پر خوف وخشیت کی کیفیت طاری ہوجائے۔

 

دوسرا نکتہ: اللہ کی تقدیر کے تئیں ادب اختیار کیا جائے اور آندھی کو گالی نہ دی جائے، کیوں کہ اللہ عزیز وبرتر ہی آندھی کو مقدر کرتا اور دنیا میں اسے بھیجتا ہے، شیخ الاسلام محمد بن عبد الوہاب نے کتاب التوحید میں باب قائم کیا ہے: آندھی کو گالی دینے کی ممانعت.

 

ابی بن کعب رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: "ہوا کو گالی مت دو، اگراس میں کوئی ناپسندیدہ چیز دیکھو تو یہ دعاء پڑھو: (اللَّهُمَّ إِنَّا نَسْأَلُكَ مِنْ خَيْرِ هَذِهِ الرِّيحِ وَخَيْرِ مَا فِيهَا وَخَيْرِ مَا أُمِرَتْ بِهِ وَنَعُوذُ بِكَ مِنْ شَرِّ هَذِهِ الرِّيحِ وَشَرِّ مَا فِيهَا وَشَرِّ مَا أُمِرَتْ بِهِ) یعنی اے اللہ! ہم تجھ سے اس ہوا کی بہتری مانگتے ہیں اور وہ بہتری جو اس میں ہے اور وہ بہتری جس کی یہ مامور ہے، اور تیری پناہ مانگتے ہیں اس ہوا کے شر سے اور اس شر سے جو اس میں ہے اور اس شر سے جس کی یہ مامور ہے۔اس حدیث کو ترمذی نے روایت کیا ہے اور کہا کہ یہ حدیث حسن صحیح ہے او رالبانی نے اسے صحیح قرار دیا ہے۔

 

صحیحین میں ابوہریرۃ رضی اللہ عنہ کی صحیح حدیث ہے کہ نبی صلی اللہ علیہ وسلم نے فرمایا: اللہ تعالٰی کا ارشاد گرامی ہے کہ ابن آدم مجھے تکلیف پہنچاتا ہے۔ وہ زمانے کو برا بھلا کہتا ہے، حالانکہ میں ہی زمانہ ہوں۔ میرے ہی ہاتھ میں تمام معاملات ہیں۔ رات اور دن کو میں ہی پھیرتا ہوں۔

 

البتہ ہوا کو ٹھنڈ یا گرم یا زور آور سے متصف کرنا جائز ہے، جیسا کہ اللہ تعالی کا فرمان ہے: ﴿ وَأَمَّا عَادٌ فَأُهْلِكُوا بِرِيحٍ صَرْصَرٍ عَاتِيَةٍ ﴾ [الحاقة: 6]

ترجمہ: اور عاد بیحد تیز وتند ہوا سے غارت کردیئے گئے۔

اور قوم ثمود کے بارے میں اللہ تعالی نے فرمایا: ﴿ وَقَالَ هَـذَا يَوْمٌ عَصِيبٌ ﴾ [هود: 77].

ترجمہ: اور کہنے لگے کہ آج کا دن بڑی مصیبت کا دن ہے۔

صحیح مسلم میں عائشہ رضی اللہ عنہ کی یہ حدیث ثابت ہے کہ : جب تیز ہوا چلتی تو نبی اکرم ﷺ یہ دعا کیا کرتے: "اللَّهُمَّ إِنِّي أَسْأَلُكَ خَيْرَهَا وَخَيْرَ مَا فِيهَا وَخَيْرَ مَا أُرْسِلَتْ بِهِ وَأَعُوذُ بِكَ مِنْ شَرِّهَا وَشَرِّ مَا فِيهَا وَشَرِّ مَا أُرْسِلَتْ بِهِ".یعنی (اے اللہ! میں تجھ سے اس کے خیر اور بھلائی کا سوال کرتا ہوں۔ اور جو اس میں ہے اس کی اور جو کچھ اس کے ذریعے بھیجا گیا ہے اس کی خیر (کا طلبگار ہوں) اور اس کے شر سے اور جو کچھ اس میں ہے اور جو اس میں بھیجا گیا ہے ا س کے شر سے تیری پناہ چاہتا ہوں)۔

 

رہی بات اس دعا کی : "اللهم اجعلها رياحا ولا تجعلها ريحا " تو یہ ایک ضعیف روایت ہے، اسے البانی وغیرہ نے ضعیف قرار دیا ہے۔

 

اے اصحاب فضیلت! یہ ہوا جس میں ہم ہر پل سانس لے رہے ، اللہ کی بڑی نعمت ہے، جب یہ ہوا تھوڑی دیر کے لیے مکدر ہوجاتی ہے تو اس وقت ہمیں اپنی بے بسی پر غور کرنا چاہئے: ﴿ ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُم بَعْضَ الَّذِي عَمِلُوا لَعَلَّهُمْ يَرْجِعُونَ ﴾ [الروم: 41].

ترجمہ: خشکی اور تری میں لوگوں کی بداعمالیوں کے باعث فساد پھیل گیا۔ اس لئے کہ انہیں ان کے بعض کرتوتوں کا پھل اللہ تعالیٰ چکھا دے (بہت) ممکن ہے کہ وه باز آجائیں۔

نیز فرمایا: ﴿ وَمَا نُرْسِلُ بِالآيَاتِ إِلاَّ تَخْوِيفاً ﴾ [الإسراء: 59]

ترجمہ: ہم تو لوگوں کو دھمکانے کے لئے ہی نشانیاں بھیجتے ہیں۔

قتادۃ کہتے ہیں: بے شک اللہ تعالی جن نشانیوں کے ذریعہ چاہتاہے ، اپنے بندوں کو ڈراتا ہے تاکہ وہ باز آجائیں ۔ انتہی

 

﴿ وَمَا أَصَابَكُم مِّن مُّصِيبَةٍ فَبِمَا كَسَبَتْ أَيْدِيكُمْ وَيَعْفُو عَن كَثِيرٍ ﴾ [الشورى: 30].

ترجمہ: تمہیں جو کچھ مصیبتیں پہنچتی ہیں وه تمہارے اپنے ہاتھوں کے کرتوت کابدلہ ہے، اور وه تو بہت سی باتوں سے درگزر فرما دیتا ہے۔

اس کا جواب یہ ہے کہ جو اس مصیبت کو پھیرنے والا ہے اس کی طرف رجوع کیا جائے:

﴿ فَلَوْلا إِذْ جَاءهُمْ بَأْسُنَا تَضَرَّعُواْ ﴾ [الأنعام: 43].

ترجمہ: پھر انھوں نے کیوں عاجزی نہ کی، جب ان پر ہمارا عذاب آیا۔

اللہ تعالی ہمیں اور آپ کو قرآن وسنت کی برکتوں سے بہرہ ور فرمائے اور ان میں جو آیت وحکمت ہے ، انہیں ہمارے لیے مفید بنائے ، آپ سب اللہ سے مغفرت طلب کریں ، یقیناً وہ خوب معاف کرنے والا بڑا مہربان ہے۔

 

دوسرا خطبہ

حمد وصلاۃ کے بعد:

اللہ کے بندو!

 

آندھی اور ہوا اللہ کی ان نشانیوں میں سے ہے جو اللہ کی وحدانیت اور ربوبیت پر دلالت کرتی ہیں، اللہ عزیز وبرتر نے قرآن مجید میں مختلف مواقع پر اس کی قسم کھائی ہے، چنانچہ اللہ پاک فرماتا ہے: ﴿ وَالذَّارِيَاتِ ذَرْوًا ﴾ [الذاريات: 1]

ترجمہ: قسم ہے ان (ہواؤں) کی جو اڑا کر بکھیرنے والی ہیں!

﴿ وَالْمُرْسَلَاتِ عُرْفاً * فالعاصفات عصفا ﴾ [المرسلات: 1،2].

ترجمہ: دل خوش کن چلتی ہواؤں کی قسم * پھر زور سے جھونکا دینے والیوں کی قسم۔

اللہ تعالی نے ہواؤں کے رخ بدلنے کا ذکر ان نشانیوں کے ساتھ کیا ہے جو اس کی ربوبیت والوہیت پر دلالت کرتی ہیں، فرمان باری تعالی ہے: ﴿ ... وَتَصْرِيفِ الرِّيَاحِ وَالسَّحَابِ الْمُسَخِّرِ بَيْنَ السَّمَاء وَالأَرْضِ لآيَاتٍ لِّقَوْمٍ يَعْقِلُونَ ﴾ [البقرة: 164]

ترجمہ: ہواؤں کے رخ بدلنا، اور بادل، جو آسمان اور زمین کے درمیان مسخر ہیں، ان میں عقلمندوں کے لئے قدرت الٰہی کی نشانیاں ہیں۔

نیز فرمایا: ﴿ وَتَصْرِيفِ الرِّيَاحِ آيَاتٌ لِّقَوْمٍ يَعْقِلُونَ ﴾ [الجاثية: 5].

ترجمہ: اور ہواؤں کے بدلنے میں بھی ان لوگوں کے لیے جو عقل رکھتے ہیں نشانیاں ہیں۔

ہوا کا معاملہ اور اس کی خلقت تعجب خیر ہے، وہ ایسی ترکیبات سے عبارت ہوتی ہیں جنہیں آپ دیکھ نہیں سکتے، درختوں کو اکھاڑ پھینکتی ہے، سمندری موجوں میں اٹھان پیدا کردیتی ہے، بسا اوقات گھروں کو منہدم کرڈالتی ہے، کبھی ٹھنڈ ہوتی ہے تو کبھی گرم، کبھی موسم کو خوشگوار بنادیتی ہے تو کبھی ٹھنڈک میں حرارت پیدا کردیتی ہے۔

 

ہوا اللہ پاک کی ایک فوج ہے جسے اللہ نے اپنے نبی سلیمان کے تابع فرمان کردیا: ﴿ وَلِسُلَيْمَانَ الرِّيحَ غُدُوُّهَا شَهْرٌ وَرَوَاحُهَا شَهْرٌ ﴾ [سبأ: 12]

ترجمہ: اور ہم نے سلیمان کے لئے ہوا کو مسخر کردیا کہ صبح کی منزل اس کی مہینہ بھر کی ہوتی تھی اور شام کی منزل بھی۔

اللہ نے ہوا کے ذریعہ اپنے نبی صلی اللہ علیہ وسلم کی مدد کی ا س دن جبکہ سارے گروہ آپ کے خلاف یکجا ہوگئے:

﴿ فَأَرْسَلْنَا عَلَيْهِمْ رِيحاً وَجُنُوداً لَّمْ تَرَوْهَا ﴾ [الأحزاب: 9]

ترجمہ: پھر ہم نے ان پر تیز وتند آندھی اور ایسے لشکر بھیجے جنہیں تم نے دیکھا ہی نہیں۔

صحیحین کی مرفوع حدیث ہے، ابن عباس روایت کرتے ہیں: "باد صبا سے میری مدد کی گئی اور قوم عاد کو مغربی ہوا سے ہلاک کیا گیا"۔

 

ابن حجر كہتے ہیں: صبا مشرقی ہوا کو کہتے ہیں اور دَبُور مغربی ہوا کو۔

 

اللہ کے بندو !

یہاں ایک اہم بات کی طرف اشارہ کرنا بھی بہتر معلوم ہوتا ہے وہ یہ کہ کائنات میں رونما ہونے والی ظاہر ی تبدیلیوں کے اگرچہ فطری اسباب وعوامل ہوتے ہیں، تاہم شرعی اسباب سے انہیں جدا کرکے دیکھنا درست نہیں، جیسا کہ سورۃ الروم کی آیت ہے: ﴿ ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُم بَعْضَ الَّذِي عَمِلُوا لَعَلَّهُمْ يَرْجِعُونَ ﴾ [الروم: 41]

ترجمہ: خشکی اور تری میں لوگوں کی بداعمالیوں کے باعث فساد پھیل گیا۔ اس لئے کہ انہیں ان کے بعض کرتوتوں کا پھل اللہ تعالیٰ چکھا دے (بہت) ممکن ہے کہ وه باز آجائیں۔

نیز اللہ تعالی کا فرمان ہے:

﴿ وَمَا أَصَابَكُم مِّن مُّصِيبَةٍ فَبِمَا كَسَبَتْ أَيْدِيكُمْ وَيَعْفُو عَن كَثِيرٍ ﴾ [الشورى: 30].

ترجمہ: تمہیں جو کچھ مصیبتیں پہنچتی ہیں وه تمہارے اپنے ہاتھوں کے کرتوت کابدلہ ہے، اور وه تو بہت سی باتوں سے درگزر فرما دیتا ہے۔

مثال کے طور پر زمینی کرسٹل میں کمزوری پیدا ہونے سے زلزلے آتے ہیں، لیکن سوال یہ ہے کہ کرسٹل کو کون کمزور کرتا ہے؟ یقیناً وہ اس کی تخلیق کرنے والا بلند وبرتر پروردگار ہی ہے۔

 

صلى اللہ علیہ وسلم